მერი, მზია და ცისკარა ანუ იყო და არა იყო რა

[youtube http://www.youtube.com/watch?v=pju1pagV4Y8]
არა, ცისკარას რას ვერჩი, აი თბილისის მერს კი, რომელსაც ძალიან უყვარს თბილისი, კი უნდა მივადგე ახლა დიდი სიამოვნებით.

პირველ დღეს არ გავიკვირვე - ნუ, რა მოხდა ახლა. დაზიანდა რაღაც. ადრეც ყოფილა. შუქიც წასულა. შევარდნაძის დროს მაინც ხო ჯობია _ ინტერნეტი მაინც მაქვს-მეთქი ვიფიქრე და დავმშვიდდი.

მეორე დღეს აივანზე მომარაგებული წყლის მარაგი ჩავუშვი საქმეში. რაღა დაგიმალოთ და ცუდად ვხარჯე. ავდექი და უნიტაზიც კი ჩავრეცხე იმ წყლით - თურმე რას ვაკეთებ?

მესამე დღეს მეგობარს ვთხოვე, წყალი აღარ მაქვს საერთოდ, მთელს მუხიანში და გლდანში არაა (არც თემქაზე) და თბილისის ზღვიდან ამის ჩამომზიდი მე არ ვარ-მეთქი. შენთან თუ მოდის გამოვალ, შევალ, ცოტა "ვანა-ტუალეტს" წავეთამაშები-მეთქი. არა, არ გეგონოთ რომ გავკადნიერდი და ტანის დაბანა მოვინდომე. ქჰმ... მიმიხვდით ალბათ.

მეგობრისგან დაბრუნებულმა, აირწინაღი მოვირგე, გული გავიმაგრე და სახლში შევედი. შემდეგ რაც მე ჩავიდინე, არც კი ვიცი, შეიძლება თუ არა ამის დაწერა, რადგან ვიცი, გავა დრო და ამის შემრცხვება.

ტოქსიკურად მომწამვლელი ჰაერით დამუხტულ ბინაში ძილი შეუძლებელია. გასულ დღეს (ანუ მეორე დღეს), რომ წყურვილის მოსაკლავად ლიტრიანი ბოთლით ლიკანი ვიყიდე ჩავცალე "ვედროში", ჩავამატე უნიტაზის საწმენდი სურნელოვანი საშუალება (იხვებს რომ ეძახიან), ეს არ ვიკმარე და ზედ ორი პეშვი არიელიც მივაყოლე _ აი, მაშინ კი მოხდა ნამდვილი სასწაული. ლიკანი თუ არიელთან ასე შევიდოდა რეაქციაში ნამდვილად არ მეგონა. ძლივს მოვასწარი ამ ჯადოსნური მასის უნიტაზში გადატანა. აქაფდა, აფორიაქდა _ ვეღარ ვაკავებ ქაფს. ჰა, ჰა და გადმოვა უნიტაზიდან. ჯანდაბას გადმოვიდეს, ლიკანია ბოლოსდაბოლოს.

ყველაფერი კარგად არის. სახლში სურნელება ტრიალებს. ჰაერი გაიწმინდა. ვიფიქრე, ჩავალ, ვიყიდი წყაროს წყალს, მოვიმარაგებ. ჩავდივარ _ თქვენ გგონიათ 2 კვარტალის ფარგლებში სადმე წყალი მოიპოვებოდა სადღეღამისო "სუპერ" მარკეტში? როგორც ჩვენი ერთი ლიდერი იტყვის ხოლმე, "ნურას უკაცრავად".

სხვა რა გზა მქონდა _ საქმეში 2 ლიტრიანი კოკაკოლა ჩავუშვი. გამახსენდა ჩემს ბავშვობაში, კოკა-კოლა როდესაც ახალი შემოსული იყო, მასზე ათასი ლეგენდა მოიფიქრეს. ხორცს თუ ჩააგდებ კოკა-კოლაში, ისე დაპატარავდება, ვერც იპოვიო (ვის მოუვიდა ისე აზრად, კოკა-კოლაში ხორცის ჩაგდება? არა, რა _ გვიყვარს ქართველებს ექსპერიმენტები). აბაზანაში კიდე თუ ჩაასხამ, ისე გააქათქათებს, ნებისმიერი სახეხი საშუალების დედაც ვატირეო (ეს, კიდევ უფრო გენიალურია _ ყველაფერს მივცემდი, რომ მენახა, როგორ წარმოიშვა იდეა აბაზანის კოკა-კოლით გახეხვისა. სხვათა შორის რამდენიმე სიუჟეტი მოფიქრებული მაქვს).

მოკლედ, ამ ფიქრებში ვიყავი გართული და დამატებით ქიმიურ ინგრედიენტებზე ვფიქრობდი, რომელსაც ჩემს მორიგ ჯადოსნურ ხსნარს გავურევდი. სანამ "კომეტი ოჯახურ პირობებში" ხსნარის კოკა-კოლასეულ ვერსიას ვამუშავებდი, გამწარებულმა ინტერნეტს მივაშურე. ინტერნეტი ხო ისეთი რამ არის _ "ყოვლისშემძლე". მამენტ შეიძლება წყალიც კი ვიპოვო სადმე და გადმოვქაჩოთქო, წავიოცნებე ისე, ჩემთვის _ უწყინარად.

ჯერ იყო და გუგლთან ჩემი ძველი და კარგი ნაცნობობის წყალობით, ძლივს ვიპოვე კომპანია "თბილისის წყლალი და ენერგიის" საიტი (ისე ძველი სახელწოდებიდან, საკანალიზაციო გაყვანილობებმა როგორ განიცადეს ტრანსფორმაცია  power-ში ეს ცალკე მსჯელობას საჭიროებს).

თქვენ ფიქრობთ, საიტზე სადმე ეწერა რა ხდება ქალაქში? რომელი ნაბოზარი დევი დაჯდა თბილისის წყალსაცავთან და იყვირა _ სირზე მკიდიხართ მერიან-პრეზიდენტიანად, წყალს არ მოგცემთ, მზიას თუ არ მომიყვანთო? ან, იქნებ იმას ფიქრობთ, რომ სადმე, საიტის ქვედა მარჯვენა ან თუნდაც მარცხენა კუთხეში, წვრილი ფონტით ბოდიშის ტექსტი იყო მიწერილი?

სამაგიეროდ რა არის ბოლო სიახლე,  მე ლიკანით უნიტაზს რომ ვრეცხავდი , თურმე იმ დღეს რომ გამოქვეყნდა? ის რომ, თბილისის წყალი ფიქრობს რომ მოსახლეობის ინდივიდუალური გამრიცხველიანობა არის სუფთა ტექნიკური პროცესი და მისთვის პოლიტიკური სარჩულის მითითება, ყოვლად დაუშვებელია! იქვე კი წერია, რომ თბილისის წყალი არის საუკეთესო კომპანია საქართველოში!!!

ჰუუუუუუუუუუუ, ღრმად ამოვისუნთქე, ლოტოსის ფორმა მივიღე, დამშვიდდი ლაშა-მეთქი, თავს შთავაგონე და ამჯერად თბილისის მერიის საიტს მივაშურე.

თავიდანვე მინდა ვთქვა, რომ ეს საიტი კი არა, გიგი უგულავას პირადი ბლოგია. ანუ რა გამოდის? რომ გიგი პრაქტიკულად ბლოგერია?! ხო და თუ ბლოგერია, აქვე დავთაგავ ბარემ  თამაშში "როგორ ჩავრეცხე უნიტაზი".

სანამ გიგი მორიგ პოსტს დაწერს, ორიოდ სიტყვით მის საიტსაც შევეხოთ. ბოლო სიახლე გვახარებს, რომ გიგი უგულავამ თბილისის ზღვაზე მიმდინარე მორიგი გრანდიოზული მშენებლობა დაათვალიერა. კადრში რა თქმა უნდა ჩანს გიგი, ფონზე კი ჩვენი მთავრობის უსაყვარლესი 3D-ში აწყობილ-ამობეჭდილი ბილბორდები.

და ცხელი ხაზი? სადაა ცხელი ხაზის ნომერი? და აქ, ისევ ჩვენი ერთი საყვარელი ლიდერის არ იყოს, ფრაზა გამახსენდა: "ვერ მოგართვით".

მერიის საიტზე ცხელი ხაზის ნომერი მითითებული არ არის! არა და მახსოვდა რომ იყო. ეტყობა მერიაც შეწუხდა ზედმეტი ზარებით!

სხვათა შორის GWP-ს საიტზე ეწერა დიიდი ციფრებით, მაგრამ რომ დავრეკე რიგში სამიათასოთხასმეთორმეტე ვიყავი და დიდად აღარ დავლოდებივარ _ კოკა-კოლით უნიტაზი მქონდა ჩასარეცხი.

დღეს მეოთხე დილა გათენდა _ წყალი ისევ არ არის!

P.S. ახლა პოსტისთვის ცისკარას ვიდეოები დავსერჩე იუთუბზე _ "თუ გსურთ დალიოთ წყაროს წყალი, მიმასწავლეთ სად იმყოფება თქვენი მზია". "მზია, მზია, არ მოტყნა ტვინი. ამაზე უკეთესი ქალი არ გენახოს. აჰა, შენ მზია და წყალი გამოუშვი ერთი თუ ძმა ხარ" - უნებლიედ ამომიტივტივდა თანამედროვე ცისკარას "ობრაზი".