შინ

მაჟორმა გაჟონა

სიმები - ბასი....

დარდი ათასი

ან უფრო ასი...

მიყვარხარ, მცივა

გავავლე ხაზი

დარდი უხეში

ან უფრო ნაზი

ასე თუ ისე....

ჩემი თუ სხვისი...

გინდა თუ არა...

არ ვიცი...ვიცი...

მარტივი გზააა....

მარტივი ხაზი...

დარდი უხეში

ან შენზე ნაზი...

***

ცხოვრება ილუზიაა - მთავარია არ შეგეშინდეს....

კალენდარი

დღე მზეა
შენ მათბობ
მიყვარხარ
არ გახსოვს?

მზე ისევ
მარიგებს...
მე ისევ ვალაგებ
არეულ თარიღებს...

დილა დაიწყება
და კარებს გამიღებს
ცოტა გაბრაზდება
მაგრამ გამიგებს...

:)

(რ)' ევოლუციური სამყარო

პულსი წამში ოცთახუთი...
სითბო მინუს ხუთასი....
ღერძის ირგვლივ დღეღამეში...
ბრუნი ათას ხუთასი....

გარემო ეკოლოგიურად სუფთა
სექსი ექიმის რეცეპტით
პროექტით განსაზღვრული სუნთქვა
...გადავრჩებით? – ვერცერთი...

დატრიალდა, დატრიალდა, დატრიალდაააააა....
აგორდა, აგორდა აგორდაააააა.....
აჩხრიალდა, აჩხრიალდა, აჩხრიალდაააა.....
მაინც იაგანი გაგორდააააა......

გულის ცემა ოცდახუთი,
დატრიალდა... დატრიალდა...დატრიალდა........................

ღამე

მე გავათენებ...
...................შენ დაიძინე...
შუბლზე გაკოცე,
...................გაიცინე...
შუქი ჩაგიქვრე,
..................გაწუხებდა...
ფრთხილად მოგხსენი...
.............................მარწუხები...

ნეტა რას ხედავ,
......................გესიზმრება?
იბურდღუნე და....
......................გადაბრუნდი...
მერე გელოდი...
......................დიდხანს გელოდი....
...
არდაბრუნდი....

გუშინდელი

არმიყვარს ტაში
და მანის "ქაში"...
ხედავ?..

მინდოდა ცაში...
მინდოდა გამეცვალე....
სხვაში...
ვბედავ?..

როგორ დამთავრდა გუშინ ის ფილმი? ჩამძინებია...
თუ შენც არ გახსოვს, მაკოცე მაშინ...

დამისხი რა ყავა....ხო იცი არ მიყვარს ქაში...

არა

ავიღებ და დავწვავ
ნუ კითხულობ ამ ლექს....
დაგიკიდებ ფეხზე
ახალი წლის დამდეგს....

ავდგები და გეტყვი
ჩემი სიტყვა – სეტყვა
არ მოგბეზრდა ნეტა
ლეიბების ბერტყვა?

იცი როგორ მიყვარს
ამ ლობიოს სუნი
ორთქლი, ორთქლი, მჭადიც
წამივიდა სული...

ნუ კითხულობ ამ ლექსს
ამ ლექს მაინც დავწვავ...
ვიცი რომ გიყვარვარ
მაგრამ მაინც არგწამს......

სამომავლეთი

”დრო არ მიდის. ის ჩვენ მოგვყვება.”
თავადი ელიზბარ ანდრონიკაშვილი

გამარჯობა გიორგი. როგორც ხედავ ეს მოხდა... გამომივიდა...შევძელი... წერილი წესით იქ უნდა იპოვო სადაც მე და ჩემი დროის ეტლი გავუჩინარდით...სხვენზე...
გული მწყდება, რომ მანქანა დიდი საგნების დაბრუნებას წარსულში ვერ ახერხებს. აწი სამწუხაროდ მხოლოდ წინ შევძლებ სვლას.
დღევანდელი სამყარო ძალიან განსხვავდება ჩვენი დროისგან. ირგვლივ ხმაურია ვცდილობ გავერკვე და შემდგომ უფრო დაწვრილებით მოგწერთ ყველაფერს.
დროებით, უნდა დაგტოვოთ. მგონი დუელში მიწვევენ, თუმცა მიზეზს დიდად ვერ მივუხვდი - ”ვერხედავ შეჩემა წითელზე რო დგეხარ, გაიარეო”. კიდევ კარგი დამბაჩა თან მაქვს.

დროებით ბატონო გიორგი. თავადი ელიზბარ ანდრონიკაშვილი
2001 წელი



გიორგი გამარჯობა,
იმედია ეს წერილი ისევე როგორც პირველი, ხელთ გიპყრია და კითხულობ. როგორც იცი ჩემი დროის ეტლი ერთხელ თუ გაჩერდა შემდეგ ვეღარ ავამუშავებ. ამიტომაც ვცდილობ მცირედით შევყოვნდე ყოველ ახალ დროებაში.

ირგვლივ მხოლოდ მიმოხედვას ვასწრებ.
კიდევ კარგი ამჯერად ერთერთი სასახლის სახურავზე მოვხვდი. ვერ წარმოიდგენ ირგვლივ რამდენი სასახლეებია. მგონი ყველა ქართველი თავადი ან მეფე გახდა და სასახლე აიშენა.
გახსოვს ჩვენი ხუროთმოძღვარი რომ გვეუბნებოდა - სასახლეს სამ სართულზე მეტი თუ ექნება აუცილებლად დაინგრევაო?
ეხლა ვითვლიდი: ექვს სართულიანი, ცხრა სართულიანი და თექვსმეტ სართულიანი სასახლეც კი აღმოვაჩინე. დიდება ქართველ ერს გიორგი. ძალიან გამიხარდა.
გიორგი, უნდა წავიდე. თავადმა რომლის სასახლის სახურავზეც ვიმყოფები მოახლეები გამომიგზავნა. მოახლეებმა თავადი აიეტის მოკრძალებული თხოვნა გადმომცეს და მეც დაუყოვნებლივ ვტოვებ სასახლესაც და სასახლის სახურავს.

რაღა დაგიმალოთ და მენატრებით. თუმცა ჯერ სამი დღეც არ გასულა რაც ვმოგზაურობ.
2002 წელი


გიორგი ისევ მე ვარ,
ირგვლივ იმდენი რამ არის შეცვლილი, მეშინია დროის მონაკვეთი დიდად გავზარდო. ამიტომაც მცირედით მივიწევ წინ.

დღეს გიორგობაა, გილოცავ გიორგი. მაინტერესებდა როგორ აღნიშნავდნენ ქართველები სამომავლოდ ამ წმინდა დღესასწაულს.
მთელი დღე სულგანაბული ვაკვირდები დღევანდელ დღესასწაულს.
დილიდანვე ეკლესიასთან უამრავი ხალხი შეიკრიბა. თუმცა ის გამიკვირდა, რომ ხალხი ეკლესიაში კი არ შევიდა, მრევლი ეკლესიასთან ზურგით დადგა და იმ სასახლეს შემოარტყეს ალყა, რომლის სახურავზეც ვიმყოფები.
თანაც რაღცას გაჰყვირიან. მგონი ”მშია..მშიაო” - კარგად არ მესმის.
შემდეგ ეს ხალხი ისე მოაწყდა სასახლის კარმიდამოს არამგონია თავადს კარგად ჰქონდეს საქმე. ეჭვი მაქვს რომ გლეხობა ამ თავადის დიდად უკმაყოფილოა.

ეხლა ცა უცნაურმა ცეცხლმა გაანათა - ყვითელი, წითელი, მწვანე... ხალხს გაუხარდა. მე კი ვშიშობ ცეცხლმა დროის ეტლი არ დამიზიანოს.

დროებით. ელიზბარი
2003 წელი


დილამშვიდობის გიორგი ბატონო.
კიდევ ერთი ნაბიჯი გადავდგი მომავალში. დიდად არაფერი შეცვლილა. ნეტავი წარსულში დაბრუნება შემეძლოს, ჩემს ანიტას მაინც შევხვდებოდი.
გასულ წელთან შედარებით სიწნყარეა. თუმცა ზოგადად ქვეყანა ძალიან შეცვლილია. თითქოს ყველაფერი აჩქარებულა. თითქოს ყველას სადღაც ეჩქარებაო. თითქოს ადამიანებს სიმშვიდე დაუკარგავსო.
გიორგი, ადგილს შევიცვლი და წერას განვაგრძობ თორემ მიწიდან ამომავალი წყლის წვეთები, რომელიც ამ კარმიდამოში მოუწყვიათ წერაში ხელს მიშლის...
...ვაგრძელებ წერას. ძლივს ვიპოვე ადგილი სადაც მიწიდან წყალი არ ჩქეფს და ფურცელს არ მისველებს - დიდი და თეთრი სასახლეა...ცივა, იატაკი მთლიანად გაყინულია.
შევეცდები რამდენიმე წლით განვაგრძო ჩემი მოგზაურობა. აქ ძალიან ცივა.

თავადი ანდრონიკაშვილი
2004 წელი.


ერთადერთი რასაც ვამჩნევ სასახლეები ისეთი ერთფეროვანი არ არის როგორც წარსულში. ყველა სასახლე მხიარულია და ლამაზი ფერებით არის მორთული. ვფიქრობ, ეხლა ძლიერ იცინი. წარმოიდგენე, რომ სასახლის მოსართავ-მოსაკაზმავად გვქონოდა მე და შენ დრო.

ალბათ ხვდები რა ბედნიერია ჩვენი ქვეყანა და ქართველები.
2005 წელი


ძვირფასო გიორგი,
მივხვდი რომ არაფერი იცვლებოდა და დროის ბიჯი გავზარდე.
ყველა სასახლეზე დიდი დროშაა გამოფენილი. გახსოვს მოგწერე გიორგობას გლეხებმა თავადის სასახლეს ალყა, რომ შემოარტყეს. თუ მეხსიერება არ მღალატობს ეს გლეხი ვარდებით მიდიოდა თავადთან მისალოცად. მამაცი კაცი უნდა იყოს თუ სხვა ამბოხებულებს არ შეუშინდა და თავადის ერთგული დარჩა.
დროშებზე წარწერაა ”საქმე ლაპარაკის ნაცვლად”. ვფიქრობ მშრომელი ადამიანი უნდა იყოს.
შევეცდები უფრო შორეული საქართველო დავათვალიერო და მოგიყვე მასზე.
ეხლა ვხვდები, რომ ჩვენი წინაპრების სისხლი ტყუილად არ დაღვრილა გიორგი ბატონო. ვწუხვარ რომ დროის ეტლის დატოვება და ჩვენი სამშობლოს უკეთ დათვალიერება არ შემიძლია. მომავალამდე.

შენი ერთგული ძმა და მეგობარი - ელიზბარი
2008 წელი


კეთილი დილა გიორგი,
მგონი ძალიან ვიჩქარე და რაღაც გამომრჩა.
სასახლეები აქ გაცილებით მაღალია. ყველა სასახლეს უცნაური ნიშნებით არის აჭრელებული. უცნაური ნიშნები არის...ერთმანეთში გადახლართული ხაზები. ქართული წარწერაც კი ვერსად ვიპოვე, ვერცერთ სასახლეზე.
შენ წარმოიდგინე ცაზე ღრუბლების მაგივრად დიდი ნახატია, ოღონდ ეს ნახატი შენ წარმოიდგინე ცოცხალია და მოძრაობს.
მოულოდნელად მომცრო ტანის მამაკაცი ჩნდება, მოყვითალო კანის ფერით და ვიწრო თვალებით. დამპრყრობელი არ უნდა იყოს რადგან ძალიან ხშირად იღიმება.
იქვე ჩემთვის გაუგებარი ნიშნებია, რომლებიც ვერ გამოვიცანი. იქნებ შენ ნახო გიორგი ბატონო. შევეცდები გადმოვხატო.

Selections 2030 - 剻割剏劦効勷 2030

რაც უფრო შორს მივდივარ სულ უფრო მიჭირს წარსულში წერილის გამოგზავნა. იმედია მომდევნო გაჩერებიდან მოგწერ. იმედია ყველას უყვები რა ბედნიერი არის ჩვენი ქვეყანა.

დროებით გიორგი ბატონო
თავადი ელიზბარ ანდრონიკაშვილი
2030 წელი

ზღვარზე

შენ ბოტიჩელის არ ხარ ვენერა
არც ოცნებახარ წმინდა
უბრალოდ შენზე ფიქრი მერევა
და შენთან მინდა...

მე შენზე ფიქრში არ ვათევ ღამეს
მე შენზე ფიქრით მიტყდება ძილი
მომაგონდება და მომინდება
შენი სხეული... და მიწის თხილი...

შენ ბოტიჩელის არ ხარ ვენერა
არც მინდა იყო
შენ მიწიერი ხარ საოცრება...
ამიტომ მიმძიმს
რომ დაგივიწყო....

***

რაც არ უნდა მოხდეს
ავი
შენი დახვეული თმები
შავი
შენი ცეცხლიანი სუნთქვა
მზერა
ვერა, არა...არა, არა....
ვერა....
რაც არ უნდა დამემალო
გემო....
მაინც მახსოვს...რომ არ მკოცნი
გცემო?
შენი შავი თმები
დახვეული....
შენზე ფიქრი ათჯერ
დახეული...
რაც არ უნდა დამემალო
გემო....
მაინც მახსოვს...რომ არ მკოცნი
გცემო?

Just Remember

თუ ერკვევი fashion-ში და
თუ ერკვევი brand-ში
ჩავარდები ძაან მაგარ ბედში
თუ გაგიჟებ გაბანა და დოლჩე
ტრუხა ბაზარს წესით უნდა მორჩე
თუ გაშინებს ობობა და ობი
ჭორაობა თუა შენი ჰობი
და თუ სხვაზე მაგარიგაქვს job-ი
just remember შენ ყოფილხარ სნობი

ნაწყვეტები

შარიშური ... შური...
ჩქარა...ცოტა ბნელა...
ხელი...თბილი მკერდი...
ნელა...ცოტა ნელა....
შენთან...კართან....ფერთან...
ვერგთმობ...მზეა სახლთან...
შენში...შენზე...შენთვის...
ჩემთან...და ჩემს გარდა...
ფაიფური...ფერი....
აბრეშუმი...ფარდა....
შენში...შენზე...შენთვის....
ჩემთან...და ჩემს გარდა....

***

იმ დღეს ვნახე ოდისევსი
მიყვებოდა ზევსი
ორი ბოთლი ლუდი
შებოლილი თევზი
იქვე "სტოიკასთან"
კანდისკი და რემბო
ჭამდნენ ცხელ–ცხელ ხინკალს
და მეც გადამედო
მათი საუბარი
იხილავდნენ ბოდლერს
სევდით უყურებდნენ
არყის დაცლილ ბოთლებს...

ძია კოლია

კოლია ეს ისე ჩვენებურად....დედამიწელების ანუ ადამიანების პირის აპარატით ამოთქმადი ბგერებით თორე ისე ... უკაცრავად სულ დამავიწყდა.... დაწერითაც ვერ დავწერ მის ნამდვილ სახელს – უბრალოდ უნდა იგრძნო....

ბოდიში... დამავიწყდა ამეხსნა რაზე ვსაუბრობ.... გაგიგონიათ სიტყვა "ეზოთერიკა"? ...ამასწინათ მამაჩემმა საშკა მოიკითხა და მეც შემთხვევით წამომცდა "ეზოთერიკაში გადავარდათქო"... შემდეგ კარგახანი ვუხსნიდი მამაჩემს, რომ ეზოთერიკა არ იყო არც ხრამი და არ ხეობა და საშკასაც რომ არაფერი არ მოუტეხავს და დაშავებია...

ჰო... დასაწყისი გაუგებარია (პრინციპში როგორც ეზოთერიკა)! ცოტაც გაუძელით... ეხლავე ყველაფერს მოგიყვებით და აგიხსნით.

...საშკა ჩემი მეგობარია. არმახსოვს როდის და არმახსოვს რატომ მაგრამ ერთ მშვენიერ დღეს მთხოვა მისთვის ფორუმი ამეწყო...

– ფორუმი რა თემაზე იქნება საშ...
–ეზოთერიზმზე...

ისე მისტიურად მიპასუხა რომ კითხვაც მომერიდა...ლექსიკონს მივარდი და გადავიკითხე:
„Эзотеризм – представляет системы тайных философских взглядов на природу явлений...“

ვერაფერიც ვერ გავიგე... მაგარამ ის გავიგე რომ ფორუმი იყო საჭირო და მეც დიდი ენთუზიაზმით ავაწყვე ფორუმი.... ფორუმი ავაწყვე და ნელნელა მივხვდი რაც იყო ეზოთერიზმი... უფროსწორად მივხვდი, რომ მას ორი განმარტება აქვს – განმარტება თავად ეზოთერიკებისთვის და ჩვეულებრივი...

თუ თქვენ ეზოთერიზმის მიმდევარი ხართ, მაშინ "ეზოთერიკა არის ყველაფერი ის რაც სწორია, რაც ძალაინ ბუნებრივია, რაც ისედაც ასე უნდა იყოს...მაგრამ ეს დაბრმავებული, გაბჟუებული და ჭეშმარიტ გზას და ბუნებას აცდენილი კაცობრიობა ვერ აღიქვამს..."

მაგრამ თუ თქვენ ერთი რიგითი მოკვდავიხართ და არასოდეს არ დაფიქრებულხართ თუნდაც იმაზე, რომ თქვენი აზრები ყოველთვის კოსმოსში იგზავნება საგალაქტიკაშორისო სივრცეში, იქ მუშავდება და შემდეგ უკან გიბრუნდებათ მაშინ თქვენთვი ეზოთერიკა არის უბრალოდ "მისტიურად დანახული და აღქმული სამყარო"...

მოკლედ ფორუმზე ბევრი საინტერესო რამ გაირკვა...

10. გაირკვა რომ წყალი ენერგიას და აურას ინახავს, ამის მიხედვით ან სასარგებლოა, ან მავნებელი...
9. თურმე სამშობიაროებში სულ ტყუილად ყრით ფულს....საკმარისია დიდი აუზი და თბილი წყალი
8. წამლებმა გაცილებით მეტი ადამიანის სიცოცლე იმსხვერპლეს ვიდრე შავი ჭირის და მეორე მსოფლიო ომის დროს დაიღუპა ერთად აღებული....
7. უცხოპლანეტელები მაღალტექნოლოგიური არსებები კი არა პირიქით.... პირველყოფილი არსებებია, რომელებიც ბუნებრივი ძალის მეშვეობით გადაადგილდებიან დროსა და სივრცეში....
6. თუ ვინმეს ცნობ სახეზე და არ გახსენდება საიდან, აუცილებლად წინა ცხოვრებაში გყავს ნანახი... ნუ ნანახი რა, შეიძლება მონაწველიც კი... (წინა ცხოვრებაში შეიძლება ცხოველი იყავი...პრინციპში არაა სავალდებულო რომ მომდევნოშიც რამე შეიცვალოს)
და ა.შ.

და TOP ათეულის პირველ ადგილზე მოხვდა თემა, რომელმაც საერთოდ შეცვალა ჩემი წარმოდგენა სამყაროზე....

როგორც უკვე აღვნიშნე, თურმე ყველა ინფორმაცია საბოლოოდ კოსმოსში იყრის თავს...იქ მუშავდება, გადაეცემა სხვა გალაქტიკებს და სხვადასხვა ფორმით აუცილებლად ბრუნდება უკან...

გონებიდან გულამდე, გულიდან დედამიწამდე, დედამიწიდან მზის სისტემაში, შემდეგ გალაქტიკაში, შემდეგ გალაქტიკაშორის....განუწყვეტელი კავშირია.... მთელი სამყარო დაფარულია უხილავი ინფორმაციული ტალღებით... ყველაფერი რასაც აკეთებთ ვიღაც ხედავს...ყველაფერი რაც ხდება ვიღაცა არეგულირებს....ბალანსს იცავს...

წარმოიდგინეთ რამხელა სისტემა მუშაობს ისე, რომ ჩვენ წარმოდგენაც არ გვაქვს... შეისაძლოა ღამით ნანახი ცუდი სიზმარი, უბრალოდ მეზობელ გალაქტიკაში, შორეული არსების (უცხოპლანეტელი მეხამუშება) მიერ კოსმოსში გამოსტყორცნილი ნეგატიური ინფორმაციაა, რომელსაც ქვედა მეზობელმა „ელფორტი“ აუშვა სახლში (ელფორტი – ეს იქაური წყალია და ზემოთ იმიტომ რომ იქ გრავიტაცია პირიქით მოქმედებს...)

ყოველ პლანეტას, ისევე როგორც სისტემას თუ გალაქტიკას თავისი საინფორმაციო ცენტრი აქვს...

საინფორმაციო ცენტრებს მართავენ არსებები, რომლებიც რათქმაუნდა განსხეულებულები არ არიან...რათქმაუნდა ეს არსებები ადამიანებზე ბევრად გონიერნი და განვითარებულნი არიან (ყოვეთვის მინდოდა ტექსტში ნართანიანი მრავლობითი გამომეყენებინა)

დედამიწის საინფორმაციო ცენტრი ძალიან პატარაა (დაახლოებით, რომ წარმოიდგინოთ ისევე პატარაა როგორც ვანის რაიონის სოფელი ჭყვიში).

ასეთ ცენტრისთვის ერთი განვითარებული არსება (შემდგომში ადმინისტრატორი) სავსებით საკმარისია...

დედამიწის ცენტრის ადმინისტრატორი არის ძია კოლია... ძია კოლია მაშს შემდეგ დაინიშნა დედამიწის ადმინისტრატორად რაც ადამმა ყურძენი დაწურა და დათვრა...

სწორედ იმ დღიდან საგალაქტიკაშორისო კრების 104 ყრილობაზე დედამიწა განვითარებად პლანეტებს მიაკუთვნეს. ძია კოლია მაშინ ახალგაზრდა, პერსპექტიულ მუშაკად ითვლებოდა, რომელიც მოწადინებული იყო თავისი წვლილი შეეტანა, სამყაროთაშორისო ჰარმონიზაციაში.

მას მერე ბევრი დრო გავიდა... თავიდან ყველაფერი კარგად იყო, მაგრამ ბოლოს თავად გალაქტიკის მესვეურებმა გადაწყვიტეს, არსებებს, რომლებიც ამ პლანეტაზე ბინადრობდნენ, აღარაფერი ეშველებოდა.

ძია კოლია იმდენად შეეჩვია დედამიწას, არსებებს რომლებიც ამ პლანეტაზე ცხოვრობენ და თავის პატარა და მყუდრო საინფორმაციო ცენტრს, რომ საკუთარი სურვილით დარჩა დედამიწის ადმინისტრატორად.

მას მერე არც ისე ბევრი დრო, მხოლოდ რამდენიმე მილიონი წელი, გავიდა. დედამიწაზე ბევრი რამ შეიცვალა... ძია კოლიასთვის ყველაზე მეტ გაოცებას ის იწვევდა რომ რაც უფრო მეტს ცდილობდა მათთვის, რაც უფრო მეტ მსოფლიო ცოდნას უწილადებდა ადამიანები განვითარების მაგივრად სულ უკან მიდიოდნენ....

მაგრამ გამონაკლისი წესს ამტკიცებსო...ადამიანებშიც აღმოჩნდენ გამონაკლისები... ადამიანები რომლებმაც სწორად აღიქვეს მსოფლიო სიბრძნე... მათ ისიც კი შეძლეს რომ ასტრალს მიაღწიეს (გლეხურად რომ აგიხსნათ ასტრალიდან თუ ხმამაღლა დაიძახებ ძია კოლიას საინფორმაციოში ხმას მიაწვდენ და ისიც გაგაგებინებს რამეს)...

დიახ....ეზოთერიკები.

ალბათ ასტრალი, არც ისე დიდი ადგილია რომ ყველა ეზოთერიკი ერთად დაეტიოს. ამიტომაც ეზოთერიკები ერთს ირჩევენ შუამავლად (ლათინურს თუ დავესესხებით მედიუმს)...

მოკლედ რა ხდება...მედიუმი მიდის ასტრალში. ეზოთერიკები ესაუბრებიან მედიუმს, მედიუმი კი ძია კოლიას...

ძია კოლიას რათქმაუნდა შეუძლია თავად მოვიდეს ეზოთერიკებთან მაგრამ დედამიწა იმდენად გადატვირთულია რომ ცენტრის მიტოვება წამითაც არ შეიძლება... (გამუდმებით უნდა უყურო მონიტორებს, ვინმემ რაიმე არ გამოიგონოს დროზე ადრე, ვინმემ რაიმე არ ააფეთქოს, არ დაწვას და ა.შ. როგორი მოსავლელია ერთ ოთახში გამოკეტილი ექვსი მილიარდი ცელქი, მოუსვენარი და ჯიუტი ბავშვი.)

მართალია მე პირადად არ ვიცნობ ძია კოლიას მაგრამ... მე ვიცნობ საშკას, საშკა კი მედიუმს. ამიტომაც ძია კოლიას, მედიუმისთვის, მედიუმს საშკასთვის და საშკას ჩემთვის უამრავი საინტერესო რამ მოუყოლია...

ძია კოლიას იმდენად უხარია ადამიანებთან ურთიერთობა და საუბარი, ეზოთერიკების ხშირად ბავშვურ შეკითხვებსაც სიამოვნებით პასუხობ. პასუხობს მარტივი სათქმელია. არქივში პოულობს ფოტოს, ხმის ან ვიდეო ჩანაწერს და მედიუმის მეშვეობით დედამიწაზე გადმოცემს.
თურმე ერთხელ ერთერთმა ეზოთერიკმა კითხა, ჩემი საყვარელი წითელი ფეხსაცმელი, დავკარგე ადრე და სად იქნება ხომ ვერ მეტყვიო....

კარგახანს ეძება თურმე ძია კოლიამ და ერთადერთი რაც იპოვა (ისიც წასაშლელად გამზადებულ ფაილებში) ძველი სარდაფის ფოტო იყო...იქვე კუთხეში მიყრილი, ძველი წითელი „ბასანოშკებით“...

სადღაც ამ სარდაფის გარე ფასადის ფოტოც მეგულებაო უთქვამს, მაგრამ მონახვა ვეღარ მოასწრო....უგნურ ადამიანებს წყნარ ოკეანეში ნავთობი დაღვრიათ და სასწრაფოდ იყო მისახედი....

აი ასე მეგობრებო.... ამოუწურავია ეს სამყარო... ვინიცის იქნებ ეს ჩემი ნაწერი, მოეწონოს ძია კოლიას და სადღაც შორეულ საგალაქტიკაშორისო ფორუმზე დადოს.

ეზოთერიკებსაც მოვიკითხავ და მათი ფორუმის მისამართსაც აქვე დავწერ, ვინიცის ვინ ნახავს და რომელ გალაქტიკაში...

www.anastasia.ge/forum